劉皇發噚日成為「民主之父」之際，工黨議員阿Cyd何秀蘭就因為一時錯手，差啲變成「建制救星」。
話說一眾建制派表決期間突然騎呢離場之際，阿Cyd一度站立舉手，話要提出規程問題，要求立法會主席點算法定人數，變相要令立法會等多15分鐘，隨時救咗唔知表決已進行緊嘅建制派。
結果包括白鴿黨單仲偕等泛民議員，聽到阿Cyd提出點人要求後，即場向阿Cyd大嗌「唔使㗎嘞」；一向擅長點人數拉布嘅人力議員陳偉業，更激動爆粗指「X你老X！佢哋自己缺席吖嘛，你點（人數）？佢哋自己缺席，點會我哋點（人數）？儍㗎你真係！」
阿Cyd喺泛民群情洶湧下，即時收手冇再提出，據聞阿Cyd覺得大是大非應留個歷史紀錄，但大家當然更想睇建制派攞嚟衰。