《蘋果日報》社長葉一堅，人稱堅哥，39年資深報人，近21年光陰在《蘋果》度過。早前，一位重要人物跟他輸賭，《蘋果》紙媒5年後會死。堅哥選擇不相信，若果輸了，不但會輸一餐飯，還有他半生對報紙的感情，和心裏相信的奇蹟。
「我相信奇蹟，若有5份報紙執了，可能5份報紙的讀者會轉睇我哋；香港若果到最後只剩2份報紙，《蘋果》一定會是其中一份」。
這樣的大城巿，他覺得無道理一份報紙都不能生存。他希望，《蘋果》報紙版，會有10年、或者另一個20年、甚至30年壽命。
他想跟同事說：「唔好灰心囉，行多步，天無絕人之路。」
葉一堅認為《蘋果》紙媒仍有很好的生存條件，因有網站支持，最終亦會成功轉型。按他說，報紙與網站廣告收入不但已打平手，網站甚至已超越報紙。
但公司整體資源投放會繼續傾斜給網站。比例多少，他說：「慢慢已經分不開了，例如攝記都有幫忙，現在台灣員工嘈做兩份工辛苦，香港同事不嘈，算好，但今日網站成績全部是《蘋果日報》編採部做出來，報紙廣告不及網站，但網站成功不是我們《蘋果日報》啲人做咩？」報紙削減5%支出，版面少了、人又少了，「好多走了的同事都是人才，但問題是你間公司養不起咁多人，即係有頭髮邊個想做癩痢」。
「有責任撫平撕裂」
公司養不起人才是不是悲哀？「做到現在都幾悲哀，堅林（前副社長林平衡）走時我都講，我哋走過輝煌，亦都走過黑暗」。最輝煌時候，壹傳媒年賺5億，上年度約是1.6億。
紙媒過渡網媒，已經殺到埋身，「我兩個仔唔睇報紙，同我哋做得好唔好無關，佢哋習慣改變了，但還是《蘋果日報》擁躉，《爽報》出佢哋唔拎，睇《蘋果日報》手機。這跟新聞質素無關，講新聞悲哀，是講紙媒這個載具（前景）不同了」。
他說《蘋果》廣告受大圍巿道影響，也有政治封殺。「抽廣告情況，已經衰到貼地，仲會有更差？」但他相信這情況不會長久，「政治原因，一個禮拜都太長，廣告實會返嚟，不會咁長，梁振英做特首不會做成世。想用方法殺你不死，正如圍《蘋果日報》圍不到，都唔圍啦，仲會天天來嗎？」
雨傘運動，社會撕裂，他再為《蘋果》路線定調，「作為傳媒，是不是有責任撫平這種撕裂，還是更加撕裂這社會，只藍或黃才對，咪好似另一邊的《文匯報》、《大公報》，我覺得《蘋果》不應係咁樣嘅報紙」。