昨日講到天氣熱，溫度高，環境局局長黃錦星話香港最大耗電來源係商業大厦，建議商厦調校冷氣介乎在24度至26度之間，升降一度，耗電量與電費相差幾大㗎。左丁山在寫字樓照辦煮碗，秘書小姐即刻抗議，話焗死人，打錯字，呼吸唔暢順，佢堅持要將冷氣調低到20度以下。在屋企，將冷氣機定在24度，一位來訪親戚即刻話焗得滯，周身唔聚財，要走先。咁點呀？唯有將冷氣調到21度。人地以為左丁山身體弱、血氣不足，怕冷，因為到處（商場、酒家、馬場）嘅冷氣都係在22度或以下嘅，無人遵守環境局標準，除咗政府大樓與地鐵站之外。惡佬明有一次代表公司到政府工程人員寫字樓開會，室內溫度係25度，適值下午西斜，而佢係無21度不歡嘅，話開會時好頭暈，唔知啲官員講乜，只求快快趣開完會就奪門而出。
所以話呢，節省能源呢樣嘢，在漫長夏天真係好難講，香港人多數唔會聽黃錦星局長嘅勸喻──把冷氣調校至24至26度。還有呀，西九龍近年好多大厦落成，住咗唔少人，豪宅天璽對面對正西，下午三至六時，西九龍嘅大厦想唔開大個冷氣機都唔得。黃局長曾講過，家居冇西斜就可以節省能源，大家唔好買面向正西嘅樓宇啦！黃局長講得冇錯㗎，有得揀嘅話，左丁山都想買間向南樓，最好係有對流窗嘅獨立屋望住淺水灣以外嘅大海！
其實除咗商業大厦之外，香港嘅住宅大厦亦難以節省電力，乜唔係啫，香港住宅往往向天空發展，屬於垂直城市類（Vertical City）如擎天半島、凱旋門、君臨天下，將軍澳民居，新式公屋等等，又有一個數字話香港有一半人口住在15層樓以上，香港建築物之垂直高度，全世界排第一，第二名係紐約，係香港三分之一，第三名係新加坡，係香港六分之一，既然我地閒閒地住在15樓，對電梯服務梗係極度注重，24小時內不可一分鐘無電梯，是故大厦耗電量維持在高水平，更有甚者，如果電力中斷（如菲律賓）係家常便飯嘅話，豈止構成不便，直情係一個高樓住客嘅安全問題㖭！好彩香港電力供應之穩定性，係全世界第一，我地從來唔諗到有電力安全問題。咁香港電費係唔係全世界最貴呀？差好遠啫，德國最注重環保，電費貴香港三倍，在各大先進城市中，香港電費頂多係「中中地」，算係咁咯。想香港人更慳電呀？加電費啦！