信置（083）老闆黃志祥出名勤力，凡事親力親為，原來佢仲有一個偏好，就係鍾意賣樓嘅同事着鮮色衫或戴鮮色領帶去賣樓，望落醒神兼好意頭，賣樓都容易快趣清袋。佢三位公子──長子黃永光（Daryl）、二子黃永龍（David）同細仔黃永耀（Alex）當然聽話，噚日落新盤售樓處巡視時，亦全部戴紅色與橙色呔。
相信鮮色衣物旺銷情
講起都幾有趣，黃志祥平時多數戴深沉色嘅領帶，但就希望同事穿戴鮮色衣物去賣樓，佢覺得鮮色衣物加埋靚笑容，幫到銷情。信置最近推售將軍澳一個大型新盤，營業部高層田兆源與朱美儀就真係每日都係男嘅紅色呔、女嘅紅色外套。
呢個新盤噚日早上8點45分正式開賣388伙，三位太子爺10點半齊齊現身，視察銷情。Daryl與David齊戴紅呔，Alex就戴橙呔，望落都係同一色系。
今次唔係三位公子首度一齊喺新盤售樓處出現，舊年年中，信置開賣大埔逸瓏灣，應該就係三兄弟首次一齊高調露面，事關最細嘅Alex都係舊年初先至加入公司。之後到咗年底推沙田玖瓏山，佢哋三兄弟又再次一齊現身，將軍澳呢個屬於大盤，於是又見到佢哋嘞。
佢哋三兄弟現身，通常都係由大哥應付傳媒，不過噚日佢哋掛住睇實賣樓情況，只係企定定影相一陣間。Daryl曾經透露，三兄弟喺公司係坐埋同一間房工作，查實佢哋可以買埋一堆紅色呔，咁咪可以隨時交換戴囉。
李華華
mailto:[email protected]