現職商台首席智囊的陳志雲，過去20年走過高山低谷。曾經是無綫呼風喚雨的總經理，是首個由寫字樓跳到幕前，成為當紅主持人的電視台高層，涉貪事件令他由報紙娛樂版C1跳到港聞版A1。不過，性格樂觀的志雲大師不認為事件是他人生中最不開心的經歷，僅以一段艱難經歷來形容，甚至認為過程中反而令他有得着和反思，多去關愛身邊人士。對於在A1、C1經常報道他的《蘋果日報》，志雲笑說：「搞亂檔啦。」
撰文：戴彩煥
陳志雲於《蘋果日報》20年前創刊時，正於無綫任職節目部總監，由於深得當年老闆邵逸夫和方逸華信任，事業扶搖直上，2004年擢升業務總經理，得寵程度幾乎是一人之下萬人之上，直至5年前捲入涉貪事件，志雲在無綫的地位亦起了變化，雖然最終被判罪名不成立，但志雲還是選擇自行離開。
不快經歷有得着
20年過去，志雲不認為涉貪事件是人生中最不愉快經歷。志雲：「我唔會用唔開心嚟形容，我會用『經歷』嚟形容整個過程，當中學習到好多，起碼令我認識到好多身邊人都愛護我，呢啲係我冇事冇幹時，未必體會到。呢段經歷係艱難，但艱難過程當中係可以有好多得着，亦有好多反思，我哋對身邊人關心得夠唔夠多？對需要我哋去關愛嘅人，表達又足唔足夠？」
患難見真情，志雲感激好友王喜一直為他擋風擋雨，志雲說：「佢係朋友，好兄弟。但佢都有鬧我，佢脾氣係咁，佢話我時，我就會唔同佢傾偈一陣，唔係嬲佢，係等佢冷靜落嚟先。佢對佢認為係朋友嘅係好真心，因為真心，見你做得唔啱佢會話你，有時佢係有啲衝動，你受得就好啦，受唔住就反面㗎啦。」
志雲20年來走過高山低谷，就跟經歷過不少風雨的《蘋果日報》一樣，問大師對《蘋果日報》睇法？他笑說：「搞亂檔啦！以前報界都唔係咁做。《蘋果》創造咗啲新報道方法，好定唔好我唔評論。不過，我肯定娛樂圈又愛又恨，有啲演藝界朋友，《蘋果》唔寫佢，佢又覺得唔舒服，好似冇人識，如果好多人識，到《蘋果》係咁追住佢，又的確係幾煩。」《蘋果》也曾追訪志雲，可曾造成困擾？志雲笑說：「我話冇都係呃你啦，但亦都知呢個行業係咁運作，明白大家做緊大家工作。」
報紙地位難取代
究竟紙媒是否仍有生存空間？志雲說：「一定有，科技點發展，傳統媒體一定有佢存在價值，正如賣書都要繼續；電子書點流行，始終都會想去揭吓（書）。新媒體發展得好快，但我唔相信可以完全取代報紙地位。黎智英先生有佢遠見，佢可以有勇氣自己砌自己，毫不留情去砌，呢個可能係大家應該採取嘅態度。」
無綫前年發聲明封殺包括《蘋果日報》的壹傳媒，若志雲仍然在位，又會否支持這個決策？志雲：「我覺得呢個行頭真係互惠互利、唇齒相依，佢哋感受我明白，但處理就因應唔同嘅管理層有唔同理念，我個人性格，萬事以和為貴，多個朋友好過多個敵人，可以冰釋前嫌最好啦，我哋𠵱家講和諧嘛。」
蘋果20年 企硬我敢言
http://20.appledaily.com