吳君如昨日在九展出席舞台劇《狂揪夫妻》的記者會，首次演出舞台劇的君如，面對黃秋生、潘燦良和甄詠蓓一班資深舞台劇演員，她直言感到壓力並說：「對手個個都係一班馬，我只係初哥，𠵱家一個禮拜拍足7日，假期都要拍。因為呢套係名劇，唔可以爆肚，加上又冇中場休息，好緊湊，怕甩嘴同忍唔住笑。」
君如又笑稱劇中要經常打秋生，問她會否與陳可辛排戲？她笑說：「陳可辛咁斯文怕揼親，反而秋生好多肉，冇問題，次次拍到嗰個位堅想打佢，佢個人好撩人揼，今次係老婆打老公嗰種家暴，要有好多能量，食好多嘢，好驚自己冇力。」再問君如今次為何接拍？她說：「想挑戰吓自己，亦都想支持吓舞台劇。」她亦直言因排劇而少了湊女時間。
採訪：溫敏芝
攝影：陳順禎