求驗客手記:勁到被命名遠古星系CR7閃爆銀河

求驗客手記:勁到被命名遠古星系
CR7閃爆銀河

球迷將基斯坦奴朗拿度簡稱為C朗,而CR7亦都係呢位葡萄牙球星嘅另一外號。最近有天文學家將一個最古老、最遠嘅銀河星系命名為CR7,難道地球人終於知道C朗係嚟自外太空呢個秘密?

C朗囝囝Cristianinho(右),同爹哋開心過五歲生日。互聯網

天文學家認表揚C朗

其實呢個銀河星系叫CR7唔係因為C朗,但又唔係完全冇關係。CR7銀河全名係叫宇宙紅移七號(Cosmos Redshift 7),而唔係(Cristiano Ronaldo);專家估計呢個星系喺宇宙大爆炸發生之後冇耐就誕生,距離地球有成129億光年咁遠,簡單啲講就係一個好古老、距離好遠同埋最光亮嘅銀河星系喇。
不過為佢命名嘅歐洲天文學家都補充話,之所以用CR7呢個簡稱,靈感某程度係嚟自C朗。呢個科學家團隊亦係喺位於葡萄牙里斯本嘅一間大學度做研究,亦有表揚C朗呢位葡萄牙球星嘅意思。據講其中一位天文學家仲借勢大讚C朗:「CR7(今次真係指C朗)比起呢個人類所知最光最遠嘅銀河星系,仲要耀眼三倍。」

同囝囝慶生晒溫馨照

我哋返番去地球,睇吓繼續喺呢度生活嘅C朗先。佢最近好開心,啱啱喺自己個社交網站度話畀球迷知,星期四係佢囝囝嘅五歲生日,兼上載埋一張佢哋瞓喺吊床嘅合照,都相當溫馨。
C朗喺上星期代表葡萄牙國家隊踢埋歐國盃外圍賽之後,終於可以唞唞。雖然早排西班牙《阿斯報》有民意調查顯示,過半數受訪者都認同皇馬應該賣走C朗,但C朗本人就冇打算走人,仲相信喺來季可以同新帥賓尼迪斯好好合作。
有指賓帥會以加里夫巴利作為皇馬嘅進攻核心,係咪真就要到時先知,不過已經有人公然挑戰C朗喺皇馬陣中嘅一哥地位,哥倫比亞名宿艾斯派拿話,C朗唔應該霸晒全部罰球射,要讓啲畀前者嘅同胞占士洛迪古斯(J-Rod):「J-Rod喺皇馬嘅第一季踢得好好,只係皇馬成隊波整體演出唔掂。我認為C朗應該畀J-Rod多啲處理罰球嘅機會,雖然對一位一季可以入5、60球嘅球員(C朗)係唔應該說三道四,但好多時某啲位置嘅罰球其實由J-Rod去踢係更好。」

識睇,一定係睇足英台【英波Live】:
http://soccer.appledaily.com
http://bit.ly/engballlive