內地投資研究平台「格隆匯」專攻港股，香港政改咁大件事，佢哋梗係玩埋一份。喺禮拜二，即政改方案提交立法會前一日，網站上就刊登一篇名為「玩的是心跳」文章，教內地股民點樣借政改機會，喺港股食大茶飯。重點係，一定要買貼價牛熊證，兩邊同時落注。文章分析，「出結果的時候，恒指極有可能出現暴升或暴跌，如暴升，熊證瞬間打靶，但與此同時，牛證可賺取幾倍的收益。反之恒指暴跌的話，牛證虧損而熊證獲利。」聽落好有道理。
不過，昨日政改投票過程峯迴路轉，結果出咗後，大家都唔識解讀，市況又上又落，並冇想像中的單邊暴上暴落情況出現。如果內地股民真係聽佢指示，好可能牛熊兩邊都畀挾死。格隆匯分析港A股可能好犀利，但要搞清香港政壇，恐怕都未夠班。
黃尹華