勇士周二作客克里夫蘭贏波封王後，周三下晝就返到奧克蘭，稍事休息後周五就會舉行勝利巡遊，同fans慶祝事隔40年終於再次贏到總冠軍嘅喜悅。
成隊球員都係第一次攞冠軍，贏完波當晚梗係要即刻瘋狂慶祝啦。第二朝就起程返歸嘅佢哋，雖然成晚都冇瞓過咁滯，但依然精力旺盛，喺各大社交網站上載大量慶祝短片，等一班無緣喺主場親身見證愛隊封王嘅擁躉，率先感受吓喜氣先。
包機喺當地時間大約晏晝三點幾降落奧克蘭機場，球會仲好有心思，安排咗百幾位職員列隊歡迎呢班英雄返屋企；當史堤芬居里（Stephen Curry）帶住成隊落機嘅時候，佢哋都興奮尖叫「Warriors」同唱例牌冠軍歌《We Are the Champions》。勇士周五就會舉行公開勝利巡遊，正式同一大班球迷慶功，到時嘅場面將會更加熱鬧。
格連留隊 里爾講bye bye
今次勇士鬥騎士嘅六場總決賽，吸引到平均近2,000萬觀眾睇直播，係公牛王朝之後收視最高嘅總決賽戲碼。如果勇士想打造新王朝，第一件事應該係留住大前鋒祖蒙特格連（Draymond Green）。今季最大驚喜、爭少少贏埋最佳防守球員嘅格連，夏天將會成為受限制自由身；但以佢今季嘅表現，勇士就算爆cap都應該會留住佢啩。一落機亦有記者問到格連呢個問題，佢都實牙實齒咁話自己實會留隊喎。
不過，今季個正選位俾格連搶走、總決賽之前一直冇乜上陣機會嘅大衛里爾（David Lee），開開心心慶祝完之後，好可能要同一班戰友講bye bye嘞。據報勇士已經同32歲嘅里爾同埋佢嘅經理人傾掂數，大家都同意喺今個暑假搵間球會接收呢位來季年薪高達1,540萬美元嘅兩屆All-Star。