融創（1918）董事長孫宏斌一向心直口快，佢早前收購綠城（3900）、佳兆業（1638）連番觸礁，噚日喺北京提到佳兆業，似乎仲有些少氣頂，一輪嘴咁彈佳兆業，又話實在冇必要為呢單刁糾纏落去，「（現在）就算它（佳兆業）想賣，我也不想買」；即使佳兆業能夠復牌，投資者都應該「一股不剩」賣晒手頭所有股份咁話。
孫宏斌多次提到，唔明白點解外界成日話融創失敗，佢舉例話，當年可口可樂買唔成匯源果汁（1886），蝕底嘅斷估唔係可口可樂，「它是個生意，沒有對錯，所以我不認為有甚麼後悔！」
雖然話唔後悔，但係勞師動眾搞單刁又完成唔到，辛苦就肯定㗎喇。佢都承認，收購牽涉太多細節，好辛苦，嚟緊諗住休息，順便戒煙，佢話呢兩單刁實在太煩，搞到自己煙癮大咗好多。