民主黨總幹事林卓廷今年2月幫一位何婆婆出頭，拍住同何俊仁開記招，講述何婆婆俾幾間財仔游說「以債冚債」，令何婆婆喺短短兩年間，由借款8萬，變成欠債120萬，懷疑何婆婆間公屋係誘因。其中一間被點名嘅財仔易還財務，話林卓廷嘅指控無根據，嚴重損害佢嘅聲譽，前日入稟高院，話林誹謗同惡意造假，索償100萬，仲要禁制林發佈類似誹謗言論，同埋要佢公開道歉。
林卓廷噚日同八方講，佢憑良心幫何婆婆發聲，絕對唔會因為俾人告而退縮，會交畀律師全力抗辯。不過幫人咁耐，佢今次係第一次俾人告誹謗，多少都有啲壓力，始終打官司有風險，開支唔少，所以叮囑八方小心寫，費事佢又再俾人告。