嘩嘩嘩，大奇蹟日呀，民建聯同工聯會等建制派，竟然唔投票撐政改？唔通佢哋良心發現，覺得袋唔落？又或者，阿爺係咪有啲驚天大陰謀，必須先部署呢一幕低票支持政改被否決嘅歷史性時刻？花生友同一班政商界諸事友，無一不被投票結果嚇窒，而新亞教職員飯堂噚日嘅午飯時間，都就此事議論紛紛。
建制派包越位
一場世紀大蝦碌，令唔少政商界擘大個口。試問咁嘅結果，北京點可能唔嬲嬲豬？中大學者蔡子強話呀，噚日中午喺新亞教職員飯堂開餐時，大家都係七嘴八舌討論呢件事，得出幾個有趣意見，包括建制派議員一定唔識踢波，唔知道乜叫做「包越位」；二嚟就係，「原來自由黨先是北京最堅貞嘅盟友」，至少佢哋肯留守就政改方案投票，仲戥田少被搣走全國政協委員身份唔抵，覺得錯怪好人，仲話以後建制派黨團召集人一職，應該認真考慮田少。蔡子強話呢啲係成枱人觀點，唔係佢意見，講出嚟大家可以笑一笑。
查實自由黨確實係今次政改表決最關鍵一環，如果佢哋肯跟建制派離席，就唔會有此「驚奇一刻」。但查實留喺度投票支持政改，天經地義，呢鋪唔少政商界都認同自由黨意見，無必要為一個人、即係劉皇發而押後表決箒，發叔就算最終冇投到票，唔通有人覺得佢唔撐政改？有傳建制派想將責任卸去自由黨，花生友真係不敢苟同。
花生友