渣打集團（2888）新行政總裁（CEO）溫拓思（Bill Winters）上周三正式執掌帥印，未做嘢已先聲奪人，坐正當日（10號），本港股價已升4%，噚日政改被否決，渣打股價亦逆市升3%。
精簡流程以爭取更佳回報，係溫生上場後，向員工發出兩頁紙嘅核心訊息，彭博噚日引述內部電郵指，一直駐守新加坡嘅集團企業及機構客戶主管Sean Wallace，將於本月底離開工作咗5年嘅渣打，佢嘅原來職務就由同事Mark Dowie與James Courtenay分擔，即係每人戴多半頂帽，符合開源節流。
因業績不佳，今年初渣打高層已經大換血，除行政總裁冼博德下台之外，主席莊貝思亦鐵定明年離開，54歲嘅亞洲區行政總裁白承睿亦已離職，新CEO上場後繼續有高層走，究竟換完血未呢？