法國中場、有「新韋拉」之稱的保羅普巴（圖），目前身價高達8,000萬鎊，等於「兩個史達寧」，究竟喺轉會市場邊個先係有買趁手？
今夏暑假較短，英超八月八日開鑼，列強擴軍已刻不容緩。呢樣嘢摩佬最爽手，遠在智利踢緊美洲國家盃嘅法卡奧，幫哥倫比亞踢咗兩場正選，恕小弟唔知佢喺場上做咗啲乜，但已話快落實以700萬鎊借用費上「車」；摩佬嘅諗法，唔係普通人容易明白，車仔去夏兩新兵法比加斯同迪亞高哥斯達，就喺六月已簽入。摩佬戰術保守，但花球會錢，好進取，最重要眼光夠銳。
歐洲轉會市場現時三大炙手可熱嘅揀手貨，分別係近年證明越踢越進步嘅祖雲達斯中場普巴、正代表幼獅爭U21歐洲國家盃嘅中鋒哈利卡尼，同扭咗幾個月計、扭到自己謝晒嘅利物浦英格蘭翼鋒史達寧。
當中哈利卡尼上季證明係能以一人之力，拯救熱刺嘅全面射手，相信摩佬諗番球會上季聯賽最肉酸嗰場，輸畀熱刺3:5都汗顏。21個英超入球，與原紀錄保持者，名宿舒寧咸、奇連士文同走咗去皇馬掘金嘅「師兄」加里夫巴利齊名，小弟估佢現值4,000萬鎊，係今夏最值得購入的新星，唔知曼聯主帥雲高爾會唔會出手？
法國人保羅普巴，估值8,000萬鎊，去年年頭，英國《觀察家報》預測歐洲十大上位新星，佢排頭位，兩位前提嘅英兵未入流；結果呢位有「八爪魚保羅」稱號嘅6呎3吋中場名聲日隆，上年夏天世界盃入波，啱啱仲協助祖記殺入歐聯決賽。
保羅普巴喺中場瞻前顧後，酷似前輩韋拉，並喺國家隊同效力咗三季嘅祖記，都係大約每上陣五場起碼有一個入球，非常唔錯。巴塞隆拿有MSN攻，有普巴守波，天仙配；不過巴塞嘅「禁買賣期」要去到下年年頭，祖記先簽入基迪拉，預咗賣走普巴，發一筆大財，但唔知當事人等唔等得切。想食回頭草，曼聯一定買得起。還記得當年喺英國放走普巴係邊個？費爵爺是也。
史達寧，現值半個普巴，曼城渴求年輕土炮，叫價到4,000萬鎊，睇怕利物浦好難唔就範；史達寧踢法較細緻，猶勝一般靠速度嘅傳統英國翼鋒、好似早年胡禮菲臘斯同未熟嘅禾確特，而且助守一般，會啱踢主攻嘅曼城。不過20歲仔，處理個人前途，主使經理人搞到一團糟；年頭起，踢球會同國家隊大小賽事共26場，入得五球，又從未為國家、球會同自己攞過任何獎項，呢個炒價，甚至高過4,000萬鎊，相信只有曼城出得起！
曼城，上季買入主要有文加拉、沙格拿、費蘭度法蘭斯高同季中嘅韋菲特邦尼，邊個抵買，球迷心裏有數，今季第一炮如果係買史達寧，祝佢哋好運，有摩佬嘅眼光。
波神