葛民輝與當奴，同屬商業二台的明星DJ、同樣是節目中的「下靶」角色，他們8月將聯同林海峰、森美小儀、少爺占及阮兆祥「眾志成城為粒『的』」，合演《騎騎騎大會串》為商台賀壽。日前阿葛及當奴接受訪問，重演《老人院時間》的整蠱電話，連商台主席何驥都敢玩！
撰文：盧妹
眾志成城為粒「的」，乃出自大師兄葛民輝，也是商台今年的賀壽騷，阿葛日前與當奴受訪時說：「8月2號吖嘛，眾志成城為粒『的』。想好似上次軟硬演唱會咁唔着衫？唔會囉，嗰套衫要唧12個月㗎，要畀Micheal（健身教練）係咁炸你個波，你估咁易有對波呀？」嚇到當奴即刻打退堂鼓表示要着番衫。當奴又問阿葛如何構思舞台，他說：「冇㗎，揸住牙籤去打仗囉，林海峰會鬧鬼我哋㗎，今年台慶要慳啲。」
被問到打算在台上講乜，阿葛又發揮虛中有實、實中有虛的說話技巧：「唔使準備㗎，有導演、監製話畀我哋知做乜，因為度咗都唔要，次次個騷之前兩個月寫寫寫，寫完又唔要，得做之前嗰個星期先要，太早度定冇咗感覺，不過唔度又冇安全感，好似熱身咁，去到投入咗上台先可以玩到。」
台慶想挑戰「射波」
如果可以天馬行空想台慶騷有乜玩？當奴想爆商台神秘傳聞，而阿葛笑言想當日請病假：「我想試吓請病假，我扮肚痛，咁會點呢？我哋6個一齊請病假，得林海峰自己一個撐個半鐘棟篤笑，佢唔嬲㗎，佢好enjoy，佢咪逐個鬧鬼我哋囉，實有嘢講。」
兩代電台笑匠即場重演整蠱電話，阿葛打電話到商台公關部找何驥先生攞台慶騷門票，公關被他玩足4分鐘才揭穿，不過當奴再致電公關部時，不消20秒已被識穿。問到阿葛有何錦囊？他隨即轉認真mode說：「認真去做，唔認真唔得，認真生、認真死，你試吓病你都認真去病，整親隻手，睇吓點解會咁，原來個傷口係咁㗎，喊做乜鬼，睇吓係點呀嘛。我哋做整蠱電話、搞笑嗰陣唔覺得係funny，係認真，真係好想知《青雲路》後面啲電話有冇人聽。𠵱家嘅節目幾難投入，如果你想搞笑一定唔好笑，因為你係演繹一個角色，硬橋硬馬就一定唔好笑，要摸吓摸吓、撞吓撞吓先好笑。」
皇上冇嘢太監有
阿葛被問到當年做整蠱電話時曾否被鬧？他說：「唔會，直頭飛埋嚟錫你，好似糖水舖老闆娘會拎糖水嚟，仲話『好衰㗎，你整蠱我，係咪？』好冧㗎。」不過他提到有次整蠱飛圖力捧女歌手梁雁玲：「全個台地震呀，人哋以為我整蠱佢，其實係幫佢宣傳，咁以前宣傳係不停喺電視、電台播歌，我哋問佢可唔可以換歌呀，營業部即刻嚟叫我哋唔好咁呀，不過好多時皇上覺得冇嘢，太監覺得有之嘛。」
面對日漸式微的廣播業，阿葛與當奴都認為現時DJ越來越難做，當奴說：「𠵱家嘅人嘅生活係影低張相放上Instagram、facebook，以前係DJ將佢嘅生活濃縮放喺on air。𠵱家太多人share太多嘢，你試吓唔睇住時間，你可以碌幾耐個電話？根本可以唔停。」阿葛驚訝現時科技太發達：「𠵱家錄音可以WhatsApp錄條聲，唔使返電台都得㗎喎，以前係勞師動眾學用個咪，返嚟拎大嚿咪出去錄。」
難忘8字波
到底阿葛與當奴有何淵源？當奴表示因為喜歡軟硬才加入商台：「我嗰時做辦公室助理，試過幫林姓DJ去太子買波鞋，幫葛姓DJ去中環整手錶，我真心開心㗎！因為有得幫偶像做嘢，可以咁近喎！佢哋都對我好好，以前去日本係好勁嘅事，佢哋次次去親都會買好多手信畀小弟，佢送咗個8字波畀我，你記唔記得㗎？」阿葛即糾正他說：「嗰個叫eight ball呀，打桌球嗰個呀，咩8字波呀？其實我唔記得囉，咁耐又咁細，嗰時係去到買到自己冇嘢想買，咪買手信畀人囉。」
越講越興奮的葛奴，當奴更主動提出想訪問動新聞的幕後配音，他說：「佢把聲好搞笑，或者我哋7個可以試吓客串，我好想呀，但係唔講把聲係我哋囉。」阿葛於是即場教當奴用丹田同提肛扮聲：「你用錯咗啦，唔係用喉嚨㗎，要提肛先得㗎。」真定假？或者真是亂噏當秘笈，但至少他認真講，你認真笑，夠了。
蘋果20年 企硬我敢言
http://20.appledaily.com