政改決議案昨日提交立法會辯論及表決，照睇否決機會極大。其實否決冇乜大不了，如果有政客臨陣倒戈令其過關，反而會激發新一輪街頭抗爭。睇番過往兩次啟動政改，2005年否決方案後5個交易日，恒指累跌1%；2010年通過以「起錨」為口號的方案後5個交易日，恒指更累跌5%。港股昨日雖然反彈187點，但睇嚟點都要捱一棍；如今買貨，只宜小注收集。
總理李克強3月時說：「站在『互聯網+』的風口上順勢而為，會使中國經濟飛起來。」造就了「互聯網+」潮流，各行各業都搞電商，網購普及，帶挈郵寄和速遞生意滔滔，包裝用的紙品需求亦大增。舊年6月尾來港上市的長港敦信（2229），就係產銷包裝紙品，成了電商熱潮的受惠股。今日係京東商城店慶日，照例減價促銷，網店紛紛加入，長港又大把生意。
長港3月中公佈舊年多賺2.86%，收益增4.84%。當中，紙板佔總收益68.4%，瓦楞紙板及紙箱佔17.4%，撲克牌佔14.2%；睇毛利率，撲克牌為35.6%，瓦楞紙板及紙箱為30.7%，紙板則為17%。紙品生意旺，撲克牌利錢厚，難怪要上市集資增建一條紙板生產線，並另建撲克牌生產線以搶市場。長港每股盈利17分人民幣，每股派息8.1港仙，純利率達13.7%，股本回報率達19.47%，表現好過唔少同業。
長港敦信現價超值
長港招股價為1.4元，只比每股資產淨值0.962元人民幣（約1.2港元）稍高。首日掛牌市況不就，同日上市的3隻新股全部破底，連超額認購209倍的暢捷通（1588）都潛水8.2%，僅超額認購0.32倍的長港更潛水22%。以長港只係足額認購睇，大部份都係自己人，換言之，呢隻係圍到乾晒的股票，上市後暴跌，連散戶都震走，貨源更歸邊。不過，長港股價依然低殘，點解？
究其原因，原來2月時大股東在業績公佈前的股份禁售期將部份股票抵押套現，這批股票竟被易手，大股東知道後，為保障控股地位，兩度以每股1元入市增持，令持股量回復五成以上。公司話係大股東無心之失，但由於持股水平已觸發全面收購點，大股東卻表明冇咁多錢全面收購，證監會仍在研究點處理。
長港昨收0.91元，比每股資產淨值低24%；現價市盈率4.2倍，息率8.9厘。現時市值9.23億元，以集資淨額3.24億元、主板公司殼價5億元計，其業務只值0.99億元，但其營業額有10.7億元，純利近1.5億元。大股東咁着緊控股權，顯示對公司有信心，加上有盈利和高息支持，可小注吸納，仲可以博大股東私有化或賣殼。
割柑人
本欄逢周四刊登