港交所（388）行政總裁李小加舊年推動滬港通開通，刺激港股今年4月之後進入大時代，連帶佢本人都人氣急升，𠵱家市場期望李小加繼續做嘢，令到深港通或者其他乜港通盡快開通，李小加續約港交所呢件事應該都冇乜懸念喇啩。港交所噚日就宣佈，同李小加續約3年，任期去到2018年10月。
李小加嘅底薪冇乜點加，維持大約900萬元，不過佢份糧最重要係花紅與獎授股份部份，舊年佢就獲發1,000萬元花紅，令總年薪接近2,000萬元。
翻閱年報，佢2009年10月加盟港交所，過去5年幾，淨係現金薪酬，佢已經袋走大約9,000萬元。此外，佢一路獲發獎授股份，至今有57.8萬股港交所，按噚日收市價計算，市值達到1.65億元。身家如此豐厚，難怪佢一直都話冇諗住沽售港交所喇。