政改方案辯論首天，前政務司司長陳方安生喺立法會附近出現，佢係喺一個有關以人口販賣為題嘅午餐會任發言嘉賓，以一身紫色套裝加珍珠鏈雍容登場（圖）。
陳太接受訪問時，當然談及政改，佢話對於港澳辦主任王光亞同基本法委員會主任李飛就8.31人大決定到底係袋住先抑或袋一世嘅言論前後不一，真係令人唔知信邊個好：「今時今日，你都唔知信得邊個……除非係白紙黑字，否則京官今日講一套，明日京官講第二套，香港人信邊個？」
陳太話政改即使原地踏步，特區政府都應該透過本地立法，改善𠵱家特首嘅選舉方法，呢個先係一個負責任嘅表現，佢預告未來幾星期會向港府提交建議。