泛民議員為企硬否決假普選方案，噚日出席立法會會議時都各出奇招，用不同方法封咗「反對」以外嘅投票掣。其中人民力量議員大嚿陳偉業，就用咗「否決假普選」、「公民提名」同「命運自決」嘅黃色貼紙封晒其他掣，只餘「反對」一個掣可以㩒，佢喺facebook話：「哈哈，一定唔會投錯票。」
工黨阿Cyd何秀蘭就用兩個雨傘吊墜，封咗「贊成」同「棄權」兩個掣，莫乃光其後亦仿效阿Cyd，話咁做會「穩陣啲」。白鴿黨黃碧雲就用3張memo紙封剩「反對」個掣。阿Cyd提醒議員，投票前要先按出席掣，所以唔好連出席掣都封埋，雖然議員唔出席個效果同投反對一樣。