對於政務司司長林鄭月娥嚟講，噚日明顯係一個好重要嘅日子喎，特區政府向立法會提交政改方案，雖則被否決機會好大，令到好打得嘅林鄭勞勞碌碌瘦咗一個碼，最終都係空手而回得個桔，但輸人唔輸陣，所以林鄭噚日都恤咗個靚髮上陣，其間仲寫紙仔為自己打氣。
前晚曾形容自己心情「忐忑不安」嘅林鄭，噚日着咗深色寶藍上衣，米色外套配珍珠鏈出席立法會迎戰。有記者問佢呢身淡素色調係咪反映心情時，林鄭隨即望一望自己嘅裝束，但冇回應到呀。八方現場見林鄭氣息唔錯，在席嘅大部份時間都專心聆聽議員發言，而《蘋果》攝影記者就影到，佢喺席間寫紙條，上面幾粒字係：「『太上心』，要保重身體。」
譚志源𥄫住《蘋果》新聞
自我提醒要保重身體，唔通林鄭健康出咗問題？林鄭嘅新聞秘書叫大家放心，佢話林鄭親撰嘅「太上心」紙仔，係佢寫嚟鼓勵自己啫，因為過去落區宣傳政改時，好多市民都叫佢，做嘢唔好咁上心，要保重身體，怪唔得林鄭喺咁歷史性嘅關鍵時刻，自行將市民嘅支持轉化為正能量。
至於佢嘅政改拍檔譚志源，就被攝記影到用手機贒住《蘋果》嘅即時新聞，而且仲係𥄫緊女……波士林鄭嗰單紙仔新聞箒，相信唔會俾太太扭耳仔。
李八方
mailto:[email protected]
蘋果20年 企硬我敢言
http://20.appledaily.com