一向鍾意博上鏡嘅工聯會王國興，噚日喺議員好緊張開會期間，突然話要幫記者紓緩吓政改表決前嘅緊張氣氛，佢主動走向記者群，話要介紹兩幅佢親手畫嘅漫畫，話希望透過漫畫感動泛民，令佢哋轉軚支持政改。
雖然畫畫嘅嘢八方識條鐵咩，但亡國興高舉嗰兩幅畫，相信唔識畫畫都覺得畫功近乎小學雞水平，用箱頭筆求其畫嘅其中一幅叫「21世紀葉公好龍」，主要係想寸泛民對落實普選係「葉公好龍」，唔係真心想要普選，又指圖中一名掛住袋巾嘅人不斷就普選問題「搬龍門」。
至於另一幅大作就叫做「泛民變臉把戲」，批評泛民議員就普選立場經常變臉喎。
八方唔多相信咁挑釁性又小學雞嘅畫功可以感動泛民，但可以肯定佢高舉大作發言時，搞到林鄭都要忍笑。