近日城中熱門話題，肯定係立法會過唔過政改方案，恒生（011）前大班柯清輝噚日以中策（235）主席身份主持股東會，循例喺會後同傳媒朋友傾幾句，佢竟然劈頭就叫大家唔好問佢點睇政改，咁大家咪唔問囉，反正幾位大孖沙最近都講晒佢哋嘅意見。
點知柯清輝臨走前又自言自語話：「知唔知𠵱家政改點呢？」證明金融界人士都真係好關心呢件事，話唔講其實心裏面又想講。
柯清輝唔講政改，就不如講吓自己嘅投資。佢上月斥資超過2億元大手增持新灃（1223），成為第二大股東。按新灃噚日收市報0.91元，柯清輝增持呢手貨，賬面賺緊50%，相當和味。
不過，柯清輝強調，呢個係長線投資，佢認識公司管理層，公司基本面又好，佢先至決定投資，佢認為投資最緊要做due diligence（盡職審查），唔好做羊生羊太喎，咁即係阿媽係女人喇！