【杭州直擊】古天樂、劉青雲同導演陳木勝、動作導演洪金寶噚日喺杭州，拍攝電影《危城殲霸》嘅現場出席記者會，同場仲有彭于晏、吳京、廖啟智、姜皓文等。噚日係青雲嘅結婚周年紀念，太太郭藹明早一日飛到杭州撐枱腳食飯慶祝。
兩米長鞭具攻擊性
以古裝亮相嘅青雲話已經有20年冇拍動作片：「今次拍動作戲好玩，拍之前花咗幾日學用皮鞭同一啲基本功，開頭有打到自己，我要嚟練習嘅皮鞭有兩米幾長。」身旁嘅古仔即刻鬼馬咁話：「嘩！你兩米幾長！咁長咁畸形嘅。」青雲自嘲話每次攞住皮鞭出場，就係全片場最危險嘅時候。青雲話太太郭藹明專誠去到杭州陪佢，早一日兩公婆仲外出吃飯慶祝。被問到係幾多周年紀念時，青雲冇正面回答：「都好新鮮嘅。」古仔今次飾演殺人如麻嘅奸角，但就唔使打，佢話：「我喺戲中冇家人，殺好多人，但非常過癮，因為唔使打，只係青雲喺戲外打我。」
另外戲中嘅彭于晏、廖啟智都有不少打戲，彭于晏嘅武器係一把大刀，拍攝時經常會打到別人及自己，智叔就多謝洪金寶手下留情不要自己耍武器。而姜皓文提早收到電影《五個小孩的校長》中小演員所送的父親節卡，令佢非常感動。
撰文：馮仁昭
蘋果20年 企硬我敢言
http://20.appledaily.com