WTA香港網球公開賽將會喺10月12至18號，喺維園網球場進行，除咗世界排名19位嘅德國球手列絲姬肯定來港衞冕外，今年仲有個新面孔，就係06澳網及溫網女雙冠軍晏紫，大家唔好誤會，佢唔係比賽，而係做呢個賽事嘅賽務副總監，佢話會游說雙打好姐妹鄭潔再來港比賽喎。
30歲嘅晏紫六個月前再做媽媽，依家湊一個「好」字喺佢依然明艷照人，只係身形比以前豐滿咗，佢喺記者會話：「我都冇打網球好耐，但又嫌做教練太辛苦，所以答應今次做副總監，希望幫到手搞好網球賽。」晏紫09年嫁咗畀一間控股公司執行董事，近兩年更長居香港，大女三歲幾。原來晏紫本月初喺北京探過生咗囡囡嘅李娜，仲講笑話日後小晏紫同小李娜會組隊參加網球賽㖭。
講番總獎金25萬美元嘅香港站比賽，今年終於爭取到10月舉行，事關舊年喺九月中開波，啱啱接住美網，好多球手未有好狀態出戰，不過今次撞啱天津同期舉行WTA賽，咁就要視乎海外選手嘅選擇。香港一姐張玲繼續獲外卡參加決賽圈，而祁欣桐則獲外卡參加外圍賽。門票同舊年一樣，由220至880元不等，七月開始公開發售。