雖然特區政府喺噚日開始咗政改大戰，但唔少政商界甚至官場中人關心嘅，卻係某猛人「離開」大家，並且覺得呢件事對香港政局、尤其是特首梁振英係咪可以連任，影響仲大過政改過唔過囉，所以都聚焦於梁振英點應對呢件事，多於政改結果到底係點。
之不過呢，就算政改呢壇嘢幾咁悶同爛，政商界都唔可以唔關心㗎，點知阿爺會唔會因為政改唔過，懲罰香港？如果股市因此大跌，佢哋都唔多好過，所以花生友都好體諒佢哋，最後要空群而出，又登廣告又上街呼籲袋住先，無非想話畀阿爺聽，大家盡力而為，泛民唔肯轉都冇計㗎！
反CY冇得留低
不過，有啲政商界中人士私底下都同花生友講，政改唔過，其實唔係好大影響，最多咪加強咗梁振英連任嘅機會囉。但亦有好心水清嘅人諗到，政改若然瓜咗，除咗梁振英肯肯定坐多5年，有啲反梁振英嘅政界中人，就可能冇機會留低再狙擊梁振英嘞。
原來佢講緊工業界（二）立法會議員林大輝，事關大輝講過如果政改方案過唔到，佢就唔考慮下屆立法會轉戰直選。𠵱家睇嚟大輝再坐一會機會好微，他日CY有乜不足，就少咗個敢言建制派肯開腔批評咯。
花生友