叱咤一時？記得上周電視台仲播緊《大時代》，由陶大宇飾演嘅丁益蟹，攞住寫上呢四個字嘅牌坊，諷刺由曾江飾演嘅龍成邦探長已經過氣。諗諗吓，喺前兩、三年仲貴為全球最強射手之一嘅法卡奧，因為傷得多同埋復出後一直冇態，今時今日都被標籤為「叱咤一時」，英國《BBC》周三透露法卡奧快以借將身分上「車」，網上好多「車迷」都話呢宗交易制唔過。
到底法卡奧係咪已叱咤一時，筆者覺得𠵱家幫佢蓋棺定論，言之尚早，畢竟上季喺曼聯踢得差，唔可以怪晒佢。記得一代射手舒利亞，上季就曾經幫佢講好說話，話呢位哥倫比亞國腳喺曼聯成日背住個龍控波，又冇乜好輸送，梗係難入波喇！小弟同意，想再補充係，除咗戰術方面冇好好利用到法卡奧之餘，重要嘅係領隊雲高爾一直唔信佢。其實，紅魔上季一班新援，冇乜邊個踢得十分出色，法卡奧、勞基梳爾同天價嘅迪馬利亞，同以前比判若兩人，就算戴利白蘭特同安達靴里拉都係偶有佳作。
一直覺得法卡奧未見底，亦好相信每個球員都有低潮期。如果佢真係過檔車仔，可能係好事，全因為筆者相信摩連奴嘅功力！摩佬以往令過唔少球員鹹魚翻生，教國米時有伊度奧，而上季就令到賓尼迪斯口中已過氣嘅泰利，踢到曉飛。既然肯高價借入法卡奧，摩佬一定有佢獨特見解，下季如果見到「老虎」再發威，唔好驚訝！
文：東尼