正所謂瘦田冇人耕,耕開有人爭,法卡奧今季外借去曼聯,成季都係入四粒波咁大把,而且狀態一路都浮浮沉沉,起腳都冇咩力,講真以佢29歲年紀,傳聞仲嚴重報細數,加上膝部受過大傷,真係唔易打得起,曼聯唔要佢真係有理由,奇怪在咁多頂級球隊,好似車路士同馬德里體育會都爭緊佢。
唔好怪小弟小心眼,車仔領隊摩連奴,同法卡奧都係同一個經理人,就係球壇金牌經理人佐治文迪斯,小弟喺專欄已經寫過文迪斯有幾把閉,亦都擅於傳媒炒作,提高旗下球員身價。
坦白講,摩納哥財政不復當年勇,已經冇能力留住法卡奧,要走都係既成事實,到底摩連奴係真心定假意,欣賞法卡奧嘅射術,定係幫文迪斯做場大龍鳳,法卡奧去到車仔機會都好高。
坦白講,車仔確係需要前鋒替補人選,特別係迪亞高哥斯達(DC)都係容易受傷嘅男人,杜奧巴離隊,雷米唔係中鋒人才,以摩連奴以往都迷信高大中鋒,法卡奧有佢嘅特長,但摩連奴最講求效率,就算前鋒都要回防,唔好以為DC上季入波多,佢一樣要回防;法卡奧喺呢方面仲唔係太積極,小弟唔知摩佬可以忍佢幾耐。
不過車路士做水魚都唔係第一次,曾經迷信費蘭度托利斯,天價由利物浦收購佢,搞到成為笑柄。以身價計,法卡奧點都唔會好似費托咁高,摩連奴當做回禮,報答文迪斯捧紅佢都要啦。
文:牽牛