練馬師吳定強成績未達標，尚欠兩場才夠15win最低要求，本來今晚一開場五班1000米，可以向前邁進一大步，但佢隻「有情風」竟輸畀一匹冇耐前仍由自己訓練嘅馬，真係冥冥中有主宰。
事緣「至尊駿爵」此場由吳轉賢廐初出即贏，六歲澳洲自購馬第22次在港出賽，終於由柏寶操刀一放到底，克服10檔阻力6.8倍建功，姿態仲要好輕鬆嗰隻。更重要係「至尊駿爵」擊敗3.6倍大熱門吳廐「有情風」勝出，吳定強畀同袍蘇偉賢剃眼眉兼冇咗一win，唔失望就假，令佢維持仲差兩場至上岸。
吳定強行衰運，落飛黨卻贏大錢，事關佢哋臨尾重插「至尊駿爵」WP着晒綠燈，卒之中到啪啪聲，有幾百萬落袋。今場跑第三係孫廐「路路發」，中年馬轉倉後四戰三位置，仲未贏到馬交代，第四名係黃皓楠座騎另一落飛馬「天狼星」。