民建聯鍾樹根成日被人笑講錯嘢，但Tree根唔多介意，噚日喺立法會同傳媒自爆，點解會出現咁嘅情況：「因為我哋細個時鍾意將啲嘢掉轉講，例如病入膏『盲』，以前係咁講；以『靴』傳『靴』咁樣……我哋好鍾意玩，所以有時咪玩到慣咗，有時就真係錯咗。」
佢話家吓真係慘啊，因為玩慣咗，「（自己）俾佢玩死」，仲話早前吐出「雞毛鴨蒜」亦係相同原因，憶述讀書時已愛將課本改寫，包括將「岳飛，字鵬舉，相州湯陰人也。生時，有大鵬若鵠」改成「岳飛治擒距，雙州陰陽人也。生時，有大蛇入屋」，「即係等於𠵱家改圖，冇圖咪改字囉」，其實佢老婆係中文老師，「但佢已經放棄我，話教我唔到」，更自嘲「我啲中英文都係病入膏『盲』，冇得救」。