英超聯賽會噚日公佈2015/16球季賽程，估唔到喺八月八號揭幕日就有具話題性嘅大戰，皆因曼聯會喺奧脫福對熱刺；𠵱家傳緊熱刺射手哈利卡尼會喺今夏以4,000萬鎊（約4.9億港元）過檔曼聯，如果成事，呢位正喺捷克幫幼獅出戰U21歐國盃嘅超新星喺紅魔嘅聯賽處子戰，就要倒戈母會。
曼市打吡等到10月
新一季英超喺八月八號開鑼，首輪秩序嘅最好戲碼，肯定係曼聯主場對熱刺。曼聯正出價4,000萬鎊力邀上季聯賽幫熱刺入咗21球嘅哈利卡尼加盟，同荷蘭超新星迪比合組一條全新面貌嘅鋒線；如果哈利卡尼真係入「魔」，首次幫新球會踢聯賽就要倒戈熱刺，到時肯定成為熱話。雖則紅魔揭幕日要鬥熱刺，但喺八月份嘅對手唔難打，之後三場只係對阿士東維拉、紐卡素同埋史雲斯，頭四場要攞八分或以上，難度唔大。
至於新一季首場曼市打吡要去到10月24號先上演，由曼聯主場對曼城，次循環就喺下年3月19號喺曼城嘅伊蒂哈德航空球場舉行。
衞冕嘅車路士喺揭幕日將會喺主場對史雲斯，相信佢哋領隊摩連奴會好滿意，但之後一個禮拜場波就非常難啃，事關要作客對曼城。
羅渣士季初面青
另外，連續兩屆捧走英足盃嘅阿仙奴，首場聯賽就要踢倫敦打吡，喺主場對改由克羅地亞名將比歷領軍嘅韋斯咸；阿奴頭三個月個個月都有一場大波，先喺8月22號主場對利物浦，之後喺9月19號作客對車路士，然後再喺10月3號主場對曼聯。
上季喺聯賽煞科日作客史篤城慘輸1:6嘅利物浦，首戰又係作客對史篤城；之後佢哋喺8月22號同9月12號分別作客阿仙奴同埋曼聯，見到呢個賽程，領隊羅渣士肯定面都青埋，唔怪得英國啲傳媒估佢隨時過唔到九月中啦。而佢哋對愛華頓嘅默西賽德郡打吡就分別係10月3號同埋下年2月27日進行。改由英格蘭主帥麥卡倫執教嘅紐卡素，首戰主場對喺朗奴高文麾下嘅修咸頓，預計會遇到大考驗。而2015/16球季嘅煞科日就定咗喺下年5月15號。
識睇，一定係睇足英台【英波Live】：
http://soccer.appledaily.com
http://bit.ly/engballlive