今時今日，藝人賺到錢，唔只淨係投資物業咁簡單，唔少直情斥巨資入股上市公司，好似趙薇與老公黃有龍舊年底就斥資31億元入股馬雲旗下阿里影業（1060）做第二大股東；謝霆鋒舊年年底亦一擲過億元入股漢傳媒（491）成為大股東，為市場平添幾隻明星股。
新近有消息指，剛與型男黃曉明結婚嘅Angelababy（楊穎）成立創投基金AB Capital，以後佢嘅身份唔只係藝人，仲係創投基金老闆，認真巴閉！馬雲都有個叫雲鋒基金嘅創投基金，將來Angelababy分分鐘同馬雲爭項目投資㖭喎。
投資電商平台
其實Angelababy老公黃曉明之前都有跟朋友合組創投基金Star VC，可能佢見有得做，自己又成立一個。
暫時唔知道Angelababy呢個創投基金有幾大規模，只係話Angelababy係搵一班人幫佢管理，首期投資嘅公司分別係一個電商平台與「輕斷食」果蔬汁品牌HeyJuice。