政改今日開始辯論，預料聽日或後日就表決，唔少人都好奇，政改仲有冇轉機，否決之後又會出現乜嘢狀況？花生友噚日問過幾位被視為撬票對象嘅泛民議員，包括衞生服務界李國麟、民協馮檢基等，都話政府以至中央，都唔見有再派人拉票，相信政府已打定輸數，兩人亦重申否決政改。有政府中人噚日亦同花生友直言大局已定，政府已做好準備，喺政改否決後開記招講述「遺憾」立場。
梁料冧莊 推23條國教
對於政改否決後會發生乜事？該政府中人分析，隨住特首選舉制度維持1,200人小圈子，估計唔少早前放風有意競逐特首嘅人士，因為唔想為梁振英陪跑，都會自動摺埋，梁振英極可能喺阿爺維穩先於一切下再冧莊五年，並喺下屆特首任期為阿爺盡做惡啃嘢，包括23條立法、重推國民教育、加強中港融合等，以便2022年上任嘅特首免除拆彈之苦，大嘆香港未來幾年難免進一步撕裂。
除咗政府繼續為阿爺推動難啃事務，該政府中人又分析，投票反對方案嘅溫和民主派人士，或成阿爺追殺對象，因為激進派始終係泛民支持者中嘅少數，反而溫和派則屬多數。該人士點名指溫和派如公民黨湯家驊，最後尾都冇撐政改，未來或成重點打擊對象，即使成立溫和論政組織，都難獲阿爺善意回應。嘩，如果咁樣都俾阿爺針對，以後仲有人肯做溫和派？