去年佔領期間喺壹傳媒大樓外掀起嘅大媽示威浪潮，今個夏天又再捲入將軍澳！以大媽同阿叔為主嘅示威者，一連兩日殺入壹傳媒大樓外示威，噚日中午約12點，佢哋坐旅遊巴到場，揸住「要普選」等標語，有大媽就高叫「兩個兩個排隊」，盡力維持秩序。唔知點解，有人一見記者影相就用標語遮擋鏡頭，仲有人示威未開始就截的士離開，咁樣算唔算㗎？
八方現場所見，其間有兩個男子手持寫有「香港蔬菜同業聯會」、「康林之友街坊會」同「廣林之友街坊會」嘅橫額，帶領現場人高叫「支持政改」、「2017年一定要得」等口號，又有人針對自爆一億誘轉軚金額屬虛構嘅梁國雄，大叫「梁振雄落台」同要求廉署調查。唔少大媽撐住傘示威喎，唔通受到雨傘運動啟發？但相信佢哋都係怕曬啫。