【政改對決】
【本報訊】催淚彈鎮壓，讓杏林覺醒；小圈子選舉制度不公，喚起精算思政；假普選謊言襲港，終於令藝界起動。12個來自法律、建築等界別的專業人士，利用本身的專長，近月頻頻發功宣傳反對袋住先。藝界起動成員、名編劇莊梅岩表示，否決假普選政改方案，是要阻止一個謊言的開始。
記者：雷子樂
政改三人組在門常開的草地上拍攝宣傳片、京官在深圳演黑臉、還有愛字堆、周融不時搞大龍鳳……如果推銷政改是一齣戲，做過導演的藝界起動成員陳敏斌只想寄語官員：「若然你唔係真心相信你飾演緊嘅角色、內容的話，你唔會係一個稱職演員，只係一件工具。」跟一個花樽、佈景板沒有分別。
三人組「演技」如何？藝界起動另一成員何敏文說：「佢哋每次出嚟，民調就差咗。」哪京官的戲豈不是最爛？「佢哋連戲都唔做吓囉！」
「假普選似洗黑錢」
其實，在民調負責「畀反應」的香港人，在這齣戲是有一席位。陳敏斌提醒，當反對政改方案的民意抬頭，香港人才不至於繼續做臨記（臨時演員），「如政改方案通過，所有香港人，都只不過係花樽、煙灰缸、佈景板，再冇立足餘地」。他認為，假普選方案就似洗黑錢，經過所謂普選程序，給予篩選特首認受性，「就好似變番啲乾淨錢咁啦，我覺得點解我要成為嗰個使黑錢嘅銀行呀？」
演藝人，最想留在舞台、排練室、甚至書桌上，好好演戲、創作戲本。但他們憂心日後要活在謊言世界，創作自由不保，被迫以街站作舞台，「光速」製作了4套反政改短片。
何敏文不相信，以8.31框架出閘的特首候選人，會守護言論自由、創作自由這些核心價值，「好似陳奕迅咁，8首歌被（大陸）刪咗6首，我哋唔想會喺香港出現」。
「建制派人士某啲時候都話（提委會）唔完善，但當佢哋想政改方案通過嗰陣，就會包裝到好好」。陳敏斌稱，這種可以將假當真、將醜當美的文化入侵，影響或比假普選更長遠，「當成個香港意識形勢喺度改變嗰陣，咁我哋下一代，咪活係真假對錯冇乜所謂，講多兩句假就變真，壞就變好，指鹿為馬，呢啲唔係我哋香港核心價值」。
沒好政制難談民生
莊梅岩認為，否決政改，是香港人要阻止一個謊言的開始。寫劇本的人，總想為觀眾帶來希望，她認為，下一步，是要不斷重複真相，迫使政府重啟政改。
梁振英曾經說一旦否決政改，會不再重提，集中關注民生，陳敏斌認同民生的重要，但認為在沒有好的政制下，民生不可得到根本改善，「所以只做民生，係不合邏輯」。
