日前警方破獲懷疑本地激進組織全國獨立黨成員製造炸彈，有網民睇咗警方公開嘅證物，覺得有疑點，質疑係咪有人設局，噚日仲有人喺網上廣傳，話全國獨立黨疑似同一國兩制研究中心有關。話說有網民發現，一直喺本土、港獨圈子中活躍嘅張漢賢，佢嘅維基百科條目入面加咗佢係全國獨立黨搞手兼主席，後來有網民發現，作呢個修改嘅賬戶IP係來自中環中國銀行大廈，而咁啱行會成員張志剛搞嘅一國兩制研究中心，就喺中國銀行大廈入面。
由於張漢賢一向喺本土、港獨圈子中聲名好差，甚至有人形容佢係鬼，網民自然發揮想像，質疑全國獨立黨係咪中央設嘅局，張志剛係咪有份？不過，有熟悉電腦科技嘅人就話，嗰個IP地址頂多係大廈機樓，如此說來，張志剛咪躺着中槍？
一國兩制研究中心發表聲明，澄清同全國獨立黨完全無關，經查證後兩者嘅IP地址亦唔相同，指網上傳言純屬揑造，深表遺憾同譴責，已將事件交警方處理，保留追究權利。