中銀（2388）嘅小股東原來好積極提問，噚日唔少人問有關派息、不良貸款情況等，十分專業，亦有小股東見到管理層就好似見到偶像咁，大讚特讚。
有位姓葉嘅男股東就大讚總裁岳毅腳頭好，指佢一上場，中銀嘅股價就創新高，佢仲用普通話講咗句「謝謝你」。 難得有粉絲，岳總當然勁開心，仲話自己最大願望係將股價推向新高，即刻換來全場掌聲。的確，中銀噚日收報31.95元，較岳毅今年3月初上任時累升兩成，小股東高興都正常嘅。
唔止岳毅，就連退咗休嘅前總裁和廣北都被小股東點名激讚。有位小股東指，和總順應股東訴求，增加派息，而且佢在任期間，中銀香港業績理想，為銀行奠定基礎云云。唔知真係好容易以為係有人做媒。