《蘋果》20周年，八方同事眠乾睡濕，趕製《忘不了．20年》新聞圖輯巨著，聽日起讀者可以憑報頭加$168換購。同時，又炮製12版報慶特刊，後日星期五隨報附送，部份內容八方先睹為快，據講《蘋果》創辦人肥佬黎，寫咗篇逾千字感言，由創報歷史，講到佔中政改，肥佬黎坦言當年《蘋果》一炮而紅，係因為加鹽加醋，強調《蘋果》必須保持謙卑，更預言《蘋果》10年後規模會更大，不過……
《蘋果》創報當日，娛樂版頭條人物係邊個，大家記得嗎？特刊會訪問番佢；《蘋果》狗仔隊令好多藝人聞風喪膽，Eason同Kelly都不時被跟蹤偷拍，但佢哋對狗仔隊原來唔係咁厭惡，點解呢？特刊仲有唔少料爆，多年前將時任稅務局局長黃河生拉落馬，記者要午夜上門拍門問當事人；近年踢爆發展局局長陳茂波東北囤地，原來係一次意外；突發新聞喺有圖有真相嘅年代，多得讀者爆片爆相，創出新路；而《蘋果》記者採訪踏遍全球，北韓都去過，偏偏有個國度禁絕《蘋果》，但記者都堅持越過防線採訪。報道優質新聞，唔去到最前線，難道石頭爆出嚟？