身為全國政協常委嘅唐英年，喺上月20日正式成立咗香港江蘇社團總會；由唐唐牽頭，會內要員梗係星光熠熠，田北俊、任志剛、林建岳、陳永棋、何柱國、李國寶、楊孫西同鄭家純等都係常務理事及理事。
但個會成立唔夠一個月，竟然有人要跳船。何柱國旗下嘅雜誌《東周刊》喺噚日出版嘅最新一期「政官莊」欄目，用咗細細段篇幅報道：「據了解，星島新聞集團主席何柱國已辭任江蘇社團總會榮譽會長一職。」然後就簡介幾句呢個會由唐唐喺上月成立，完全冇講過佢到底因乜事要辭任。呢單新聞備受政商界諸事之徒關注，好多人剝住花生話，好想知道唐唐因乜解究令何柱國嬲嬲豬，搞到要同江蘇總會割席咁陰功豬？八方問過總會發言人，佢哋只回應不作評論。