公民黨Miss Mo毛孟靜噚日趁立法會禁止訪客進入前，率先同文化人彭志銘喺立法會開記招宣傳新書。Miss Mo話原本呢本係佢第5本英文教材書，當中唔少內容都同雨傘運動有關，所以用上《我要真普選》做書名，暫時印咗2,000本，未知中資背景書店會否因而禁售。英文一向了得嘅Miss Mo直指，民記Tree根英文唔多掂，至於會唔會派本新書畀Tree根進修吓，Miss Mo就話只派畀啲有用嘅人喎。Miss Mo近期頻頻接受外國傳媒如BBC訪問，話對外媒跟隨政府口徑用political reform形容政改有意見，認為reform一字太正面，應該叫做Beijing-decreed election plan，即北京頒佈嘅選舉方案就差唔多喎，更預告政改表決時會用英文發言，希望引起更多外國傳媒關注。