吳鎮宇既是粗聲粗氣的古惑仔「𡃁坤」，又可以是《衝上雲霄》迷人的「Sam哥」。入行超過30年，由跑龍套到男主角，從孤家寡人到結婚，他自言人生最大的轉變是為人父母，對小孩的一套他相信街童訓練法，又深信「父在做，子在看」的不二法則。由人生講到傳媒生態，《蘋果日報》的出現，帶挈藝人私生活曝光，自己就由「以前出街飲，𠵱家咪約埋去朋友屋企飲飲食食囉。」
撰文：何永寧
吳鎮宇早前接受訪問，談到《蘋果日報》即將20周年報慶，他半開玩笑說：「我入行30年，所以唔好『屹』我呀，前輩嚟㗎。」對於較他年輕10年的《蘋果日報》，鎮宇的感覺是《蘋果》是由《壹週刊》引伸出來，他說：「之前《壹週刊》有咁多人支持，係佢哋有一啲社會性內幕爆料，爆吓爆吓，死嘞佢哋爆埋娛樂圈呀，變咗我哋娛樂圈都幾震撼。如果一直維持真確性，冇理由淨係政府爆，連帶娛樂圈爆黑料都會有少少值得嘅。將（藝人）私生活曝光咗啦，係《蘋果》帶挈我哋啦。其實大家有好處知道觀眾鍾意乜，唔鍾意乜，咪檢點啲囉，令我哋啲人唔再花天酒地，喺外面，喺屋企自己飲囉。」他笑言現在已經習慣幾位好友，相約到某人家中飲飲食食。
自認老派愛睇報紙
鎮宇表示在以前，很多藝人都想將不好的事關門解決：「就算婚姻上有啲問題，以前可能離咗再結多3次都冇人知。其實爆唔爆（料）唔緊要，只要係一個事實存在，你知我乜㗎啦，大家公證啲囉，如果真係做過就算冇《蘋果》都會爆出嚟。我對《蘋果》嘅取態係中性。」從閱讀習慣出發，鎮宇自認是老派人喜歡用紙張去閱讀，所以深信至少在他這代人報紙將不會被淘汰：「唔鍾意拎住部電腦去閱讀文字，書真係要一本書，劇本真係要一本。電腦過頁好煩唔似劇本一揭就係。」
要選這20年來最印象深刻的新聞，鎮宇就選了近日亞視接連爆出的新聞，他說：「你睇住一個文明社會嘅電視台變咗斷糧斷水，好似埃塞俄比亞難民咁。你好難親眼見到一個標誌結束玩完嘅一日，都係一個『里程碑』。又搞埋跳舞、報錯領導人死訊、又賣又唔賣啲節目又循環播，完全係冇迹可尋。」
以身作則教仔
入行的30年，吳鎮宇最大的改變，撇開名成利就自然要數到結婚及生兒育女。鎮宇對下一代本着「父在做、子在看」的原則，他說：「呢樣比較得人驚啲，最容易影響到下一代。小朋友識諗，如果個老竇做咗啲乞人憎嘅嘢，小朋友心會諗『咁乞人憎嘅』，所以做爹哋個原則性要強啲。」
對下一代他採用街童訓練法，在這種情況下孩子能有最強的適應能力，他說：「明日之後相信世界可以生存嘅只有曱甴、老鼠同街童。最緊要係一個快樂嘅人，學業成績唔緊要，因為據統計讀唔成書成為有錢佬嘅機會，較讀得成書嘅高。」
場地：L19 Harlan's（The ONE）
