唔少反對袋住先嘅網民，都話政府方案通過咗，最後只會有梁振英、民建聯鍾樹根同蔣麗芸3個爛橙可以揀。既然網民咁睇得起，Tree根點可以冇表示，佢噚日喺《大公報》撰文，題為〈假如我真的去參選特首……〉，形容對於經常俾反對派稱為可以出閘做特首候選人嘅「濃情厚意」受寵若驚喎。
Tree根嚟真咁話喎，諗過如果自己成為特首候選人，就要做好多拉票工程，例如寫政綱同參與公開論壇增加曝光，又話如果要接觸500萬合資格選民，拉票工作一啲都唔簡單，講嚟講去又係藉機撐政改，「如果此方法亦不算是真普選，那麼『真普選』便要到天堂才可找到」。
八方都好欣賞Tree根咁重視網民嘅意見，但似乎佢真係諗多咗嘞，政圈熱傳嘅黑馬中，唔覺得佢榜上有名喎？有網民都話佢此舉叫做「癡根妄想」，亦有人話佢如果去選，應該有更多香港人會移民。
識睇睇留言
Thomas Kam：佢去選的話就更多人要移民走人。
Rog Federer：Tree根又飲大咗。
Herbert Kwok：假如你真的去參選特首，500萬人七一上街。
Terry Yeung：假如痴根當選，香港要改名為「香梗」。
Ken Lau：比較like張融、高達、私煙三揀一。淨心收左皮？消失左。
Antony Wong：全力支持tree gun參選同出閘，可惜我不是千二人其中一個，不能讓你帶更多歡樂畀香港人。
資料來源：《蘋果》網頁