有長沙股民喺上禮拜以配資方式，炒燶股跳樓，令呢種中國式孖展備受關注。所謂配資炒股，即係客戶向P2P（網絡借貸）或信託公司借錢，以4至10倍槓桿炒股，股票戶口裝有特殊軟件，股價稍有波動就會自動代客斬倉，隨時血本無歸。
2008年金融海嘯買Accumulator中過招的香港股民就會知，當年Accumulator都有資產限制，但而家打開內地P2P網站，周圍都推介配資炒股，人人都買得，只要篤幾下手機，仲簡單過去街市買餸。
最慘係，呢種風險遠大過孖展的投資方式，竟毫無監管，因為中證監管唔到P2P同信託公司。內地傳媒報道，配資炒股最早在溫州出現，現時大多數配資公司都來自該處。2012年內地溫州民間借貸爆煲，當時好多人跳樓，惟有希望將來悲劇唔會重演。
黃尹華