阿仙奴位於倫敦嘅主場阿聯酋球場，周一晚燈光火着，仲搭晒舞台、放晒綵帶，乜英足盃冠軍慶祝會𠵱家先搞？原來兵工廠只不過係搞新一季嘅球衣發佈會，仲搵埋昔日「高貝利大帝」亨利返嚟做MC㖭，唔通阿仙奴咁有信心，預演定來季英超冠軍捧盃派對？
亨利做MC搶爆鏡頭
英國傳媒就出名刻薄，《每日郵報》就寸：「冷靜啲，新波衫發佈會啫！」雖然阿仙奴假假地連續兩年拎英足盃，但都繼續俾網民寸：「乜阿仙奴拎咗聯賽冠軍咩？」阿仙奴真係「躺着也中槍」。今次係「豹牌」接手後，幫阿仙奴推出嘅第二件主場波衫，會方都高度重視，有過千球迷喺發佈會開始前幾個鐘已經排定隊等入場。
雖然智利前鋒阿歷斯山齊士𠵱家踢緊美洲國家盃，同奧斯爾、梅迪薩卡等國腳放緊假冇出席，阿仙奴都安排咗唔少球星示範，包括前鋒韋碧克、中場辛迪卡索拉、路斯基等；做主持嘅亨利就逐個球員訪問，最開心就係「新大帝」韋碧克；韋碧克就話新衫冇上年嗰件咁貼身，終於可以唞大啖啲氣，主場球衣保持紅衫白袖，亨利就話呢個係傳統，真係好難改變。其實新波衫都有啲改變，好似領口改扣鈕設計，較為傳統。「豹牌」香港公關就話，新波衫就會喺6月26日到港，普通版賣599，落場版賣1,599，樓上波衫舖Kitroom就預計七月中會有貨返。
爆施治槍手好事近
其實阿仙奴對上一次聯賽冠軍，已經數到2004年，呢幾年都係排吓第三、第四。新一季車路士保持強勢，雙曼又話不斷擴軍，阿仙奴要拎冠軍唔係咁易，不過兵工廠都陸續傳來擴軍消息，好似車路士門將訓練員就爆料，話車仔門將施治屬意加盟阿仙奴多啲，另外又傳買德國孖寶達斯拿同拿斯賓達㖭。
不過阿仙奴靈魂人物、領隊雲格就冇出席發佈會，反而到咗北非摩洛哥出席慈善足球賽，仲有杜奧巴、施斯、皮利斯等新舊球星撐場，適逢當地舉行喜劇節，雲格着住由多位國際喜劇演員人頭組成嘅T恤，我求大俠覺得佢當堂後生咗廿年！
識睇，一定係睇足英台【英波Live】：
http://soccer.appledaily.com
http://bit.ly/engballlive