博物館或曾經畀你靜嚶嚶同凍冰冰嘅感覺，今個夏天去吓康文署搞嘅「香港博物館節2015」，或者有新體驗。署方噚日介紹咗好多個活動，為期16日（6月27日至7月12日），提供70項活動，有得睇又有得玩，預計30萬人次參加。
文物修復辦事處嘅「文物醫生」珍藏上醫館，喺博物館節期公開「應診」，登記咗嘅市民有15分鐘免費診症，睇睇「病人」（舊證書、相片、銀器等）需要點樣嘅修復治療，仲有30分鐘臨床實習，專人教你點樣修復，但要及早預約。
專人示範做彗星
有個「外星人玩轉太空館」活動，7月11日夜晚太空館入面開party，接待101個小四到小六學生，夜晚扮吓外星人侵略地球，但必須要由一個成人陪同。
傳統七月十四盂蘭節就到，歷史博物館安排咗傳統紮紙工作坊，教市民親手做迷你花牌應用竹蔑、銻花、皺紋膠等。
市民亦可以參加藝術館「我要做館長」，體驗館長任務3小時，等大家可以入到館長辦公室，親身了解策展同博物館管理。北京故宮博物院則借出120件清代西洋古物，喺香港科學館展出，其中包括銅鍍金象馱四面錶、銀鍍金渾儀同盤式手搖計算器。
太空館仲安排專人示範點做彗星，除咗有輕微小爆炸，仲有小碎石彈出，好似真嘅咁呀！