史力加之父許誠毅執導嘅真人3D電影《捉妖記》，噚日喺昂坪做宣傳，吳君如特登去撐場，佢話：「許誠毅原來係陳可辛幼稚園同學，佢今次搵到我演妖界大美人，我一口答應。拍呢部戲有3個辛苦，要打、着古裝同戴頭飾，不過許導演返嚟香港拍巨著，成個製作好好，而且我未試過演一個妖怪，我終於有部戲可以畀阿女睇，唔使成日演雞鴨，但我未試過一部戲拍兩次。」
DVD留柯震東戲份
由於男主角柯震東舊年喺內地同房祖名一齊吸毒，而俾內地官方全面封殺，搞到《捉》片換咗井柏然再重拍一次，但估唔到安樂電影用咗3,500萬重新補拍後，𠵱家又話可以解禁。許導話希望日後喺DVD出個導演剪輯版，保留柯震東嘅演出。
另外，傳聞下個月初房祖名演出嘅《道士下山》同柯震東演嘅《小時代4》都可以唔使換人或刪戲，正常上映 。
其實《道》同《小》片一樣送咗個「乾淨版」去電影局審批，但兩星期前電影局通知佢哋重新攞番舊版嚟送，換言之佢哋兩個可以出生天啦！
撰文：馮仁昭