行政會議突然喺較早時候通過，中、低層公務員加4.62%，高層就加 3.96%，即係較薪酬趨勢調查嘅指標高0.5至1.6個百分點，額外涉及9億。公僕圈對此梗係一片歡呼聲，加人工喎，邊個唔想？理得佢個原因係乜、係咪符合公務員嘅加薪機制！但其實唔係個個公僕都被少少甜頭沖昏頭腦，有人話今次開得呢個可以唔按調查結果加薪前科，日後就要承受，有可能按調查建議再減更多人工嘅惡果。
倘不合作難施政
其實呢次加薪，最多人討論嘅唔係加咗嘅幅度，而係特區政府點解忽然皇恩浩蕩畀甜頭公務員？雖然政府話呀，係根據嗰幾個指標，覺得公務員應該額外加薪，但更多人都認定今次屬一個政治決定，始終公務員團體係政府施政好重要嘅群組，如果佢哋唔仆心仆命幫特首賣力，好多嘢都會事倍功半，而現任嘅特首梁振英，擺明都會去馬競逐連任。
有口痕友話，如果相對另一位梁振英嘅潛在特首競爭對手、新民黨主席葉劉淑儀，肯定係葉劉更得公務員歡心啦，而梁振英上任已經半個任期，佢好明顯睇到公務員唔合作下，施政有幾咁麻煩，所以喺呢啲因素下，梗係越早向公務員爭取支持就越好，而加薪多過預期，似乎都係一個幾好嘅買like策略，又難怪梁振英都答應喎！
有公務員衰衰咁笑笑口話，梁振英縱使用有錢收買人心呢個意欲，都未必真係達成到，君不見呢排又有黃絲公務員登報反對袋住先，相信小恩小惠未必做到好強大得益。佢個人關注嘅問題卻係，呢次可以額外加得，即係下次一樣可以額外減啦，嘩，會唔會喺公務員唔聽話時罰佢哋㗎？