到底，袋唔袋住先？可能唔少人呢一期，都為袋唔袋好心思思，但好多人相信已經作出咗決定，仲喺唔同媒體表達袋住先或抗拒袋住先嘅心聲。查實袋唔袋都好啦，如果係個人真心相信，應該唔怕被人知道立場、唔會唔見得人啩，但噚日左報《文匯報》刊出幾個學生舉牌撐政改嘅訪問時，卻好離奇地將學生嘅樣全部打格，惹嚟網民議論紛紛。
指受訪者怕被起底
作為阿爺嘅喉舌，動員支持袋住先都係好合理吖；《文匯報》就做到嚟嘢，噚日喺頭版及內版顯著報道，撐政改嘅，未必係建制中人喎，佢哋尤其針對年輕人出擊，訪問咗幾名後生仔，包括一名曾經參與過幾日佔領行動嘅學生，引述對方話後嚟發現對普選冇幫助而退出了，認為「民主進程不能一步登天，要一步步來，『袋住先』也是進步」。
報道又有自認係政治冷感嘅潘同學受訪，話忍唔住發聲，希望嗰啲成日話要以民意為依歸嘅議員可以尊重民意，又話𠵱家個方案好好喎。
網民留意嘅唔係內容，而係啲相點解要打格？有網民諷刺《文匯報》「收了錢，又不交功課足，維穩錢好好賺」，但亦有網民覺得咁樣嘅做法「好貼心」，到底係諷刺定讚美？八方真係唔識分。
《文匯報》似乎都預計有人會咁批評，喺報道中解釋因為肯接受訪問嘅學生對於影相都「略有遲疑」，原因係驚被起底、網上欺凌，所以「最終決定要見報發聲的同學，有人不願出全名，有人甚至不願正面上鏡」，而《文匯報》呢，係尊重佢哋嘅意願而將相片打格遮臉，強調「不是向霸權妥協，而是出於保護孩子們不受騷擾的良知 」。原來係咁，八方失覺晒。
識睇睇留言
Charlie Yuen：大把黃狗都戴口罩啦，又唔見你放大嚟報道？黃狗日報果然係撐班黃狗
Alvin Leung：佢哋（左報）一向都係做開呢啲嘢㗎啦，使乜咁大反應呀
王寒儀：貼心嘅做法
Gangsheng Zhang：收了錢，又不交足功課，維穩錢好好賺
Fai Wingfai：因為臨記分身扮演！咪踢爆啦
Tim Chan：四仔有格仔咁
資料來源：《蘋果日報》及《立場新聞》網站
李八方
mailto:[email protected]