一位英文老師WhatsApp來兩幅英文漫畫，一張係講1961年，三位老師拎住份成績表，喝罵一位低頭哭喪着臉嘅學生，What's the meaning of these marks？另一張係2011年嘞，畫面係父母學生三人拍枱喝罵一位老師，What's the meaning of these marks？學生蹺埋雙手笑哈哈咁，女老師就似乎嚇到手足無措。
老師今天面對不少「怪獸家長」，不知如何是好，平日教書改卷都感覺到壓力，在名氣愈大嘅學校任教，老師壓力尤其大，因為學生家長雖未必全是非富則貴，但絕大部份係有錢有面成功商人或專業人士，絕不容忍老師「蝦細路」。某名校一位老師話要罰一位唔交功課，堂上嘈吵嘅男生留堂，學生WhatsApp阿媽，到咗夠鐘放學之時，老師就收到男生阿媽嘅電話：「我係律師嚟嘅，想知道你根據學校乜嘢條款、規則嚟罰我個仔留堂，你有冇俾佢一個答辯機會，你好可能對我個仔構成精神困擾！」老師俾律師家長拋到窒晒，急急搵輔導長，輔導長與律師媽媽哦咗一輪，卒之達成協議，唔將個男生即日留堂，要留番啲面子，俾男生預約下一個星期某日「遲啲放學」！
1961年，左丁山讀緊小學，因英文測驗交白卷，俾老師罰企之餘還要捉住左丁山左手反轉過嚟用手背打書枱面十下，因手背有手指骨節，痛到流眼淚，慘過用間尺打手板好多，在2011年，如有如此老師，必定俾家長告上法庭，犯下虐待兒童罪。當年如是者俾老師打過起碼六七次，見到老師就震，回家同媽媽講，媽媽話抵打吖，拿出雞毛掃係咁打多一次，爸爸在旁就話：「勤力啲讀英文喇！」讀咪讀囉，上學期交白卷，下學期竟然英文考第一，之後就完全唔怕英文，主動搶韁去讀。本以為香港才有怪獸家長，點知個幾月前同日本賓架食飯，講起Tiger Mom，問佢日本教育情況，佢話：「我讀書之時成日俾老師摑一巴掌，入到慶應，仍然俾教授鬧，我呢一輩視為理所當然，點知我個女依家30幾歲仍未結婚，在中學教書，返到屋企就話學生曳，家長惡，佢冇晒符，日本都有Monster Parents㗎，有一次學生家長到學校鬧我個女，我話明再有下一次嘅話，我要以老師家長嘅身份，返學校鬧番啲學生家長！」