「波霸」葉紫薇復出？不過此葉紫薇不同彼葉子楣，而係一種紫色花樹。
近期全港各區，都可以睇到呢種樹，全部開緊紫色花朵，一般高2米以上，整棵樹有手掌般大嘅樹葉，紫色花則沿住凸出、反地心吸力向上生長嘅樹枝，由下向上爆開，好顯眼，而且今年好似開得特別靚。
#傳因葉子楣改名
康文署好多時會喺樹幹上掛上名牌，呢種就叫「大花紫薇」（學名Lagerstroemia speciosa），喺康文署沙田總部大樓外，就種了好多棵；費清喺堆填區路邊都見到成條街有種。
大花紫薇，同葉子楣有咩關係？原來大花紫薇舊名就叫大葉紫薇，連維基同教育局樹木資訊網頁都有列出呢個前稱。有網上資料指康文署自1997年後一律更改標示為大花紫薇，原因係為咗避開紅極一時、姓名讀音一樣的波霸葉子楣，不過呢個說法冇從查證。
點解話大葉紫薇復出？費清近日行過啱啱啟用的康文署觀塘遊樂場，就見到場內大花紫薇嘅名牌，係寫「大葉紫薇」，唔通波霸息影後，康文署打破禁忌畀舊名復出？不過，行過幾步到隔籬觀塘泳池入口花圃，就見寫番「大花紫薇」，睇嚟可能有人唔小心用咗舊名，搞到一花兩名。
費清 ＃要生計，也要生活 ＃毋忘初衷