現年84歲高齡的黃夏蕙越活越愛香港，近年頻頻為香港事務發聲，更有意明年參選立法會，爭取普選。為了建立從政形象，她決定把自己reboot（重新啟動），由頭變到落腳，驟眼看去夏蕙BB新形象如同A貨西太后Vivienne Westwood。夏蕙BB同時以潮look賀《蘋果》20周年報慶，她說：「我朝朝早先食個蘋果，然後睇《蘋果》，佢又快又真，好有良心，除咗《蘋果》，我乜都唔睇。」
講到明年參選立法會，夏蕙BB說：「希望改善民生，社會太多怨氣，唔公平，樓價太貴，巿民生活畀得錢租屋就冇得食，樓價必須調低。」她的政綱針對社會中下階層：「上層嘅人有錢唔使理，老人福利絕對唔可以忽視，政府派生果金太少。」
拒絕袋住先
夏蕙BB反對「袋住先」，她火滾說：「即係想點？又唔係Yes，又唔係No，擺明係hea住，到底袋幾耐？係咪袋到啲孫都大晒，做嘢一就一，二就二，唔好唔清唔楚，拍慢板𠱁細路，我雖然係BB，但呃唔到我。」
問夏蕙BB清楚知道特首梁振英、國家主席習近平、台灣總統馬英九、美國總統奧巴馬、俄羅斯總統普京五政男嗎？她對普京較陌生，她口快快說：「葡京。」記者更正，請夏蕙BB從他們中擇偶，她說：「洋人我唔吼。梁振英唔揀，佢成日俾人鬧，連累我出街都俾人鬧。我揀習總，咁我可以晚晚告枕頭狀，佢愛我，我乘機引導佢，將佢對我嘅愛造福港人。」
撰文：比華利
造型：林妙萍
髮型、化妝：Kathy L. of Ciao Bella
